Gal 5 | KYG | STEP | Kalaisi'a afa vaya'mo maisunafe'mo hatu maeno late'nigeta afa vaya'mo mai'nona'mofe'mo ani kava huta lokiya vaita afa vayake'mo maigetao. Ke'aepa gemo afe'alumelagamo ali'a lapatesayafe'mo nehayanagi halate kana hu'niya ali'ya'mo alitapa kalavusifi'mo o'maiyo.

Galatians 5

Afa vaya'mo mai'naya'mofe'mo afa vayake'mo maiyo, huno hu'niya gemae

1 Kalaisi'a afa vaya'mo maisunafe'mo hatu maeno late'nigeta afa vaya'mo mai'nona'mofe'mo ani kava huta lokiya vaita afa vayake'mo maigetao. Ke'aepa gemo afe'alumelagamo ali'a lapatesayafe'mo nehayanagi halate kana hu'niya ali'ya'mo alitapa kalavusifi'mo o'maiyo. 2 Inagi nagaemo Polo'namo ani gemo hu'na lapa nepauvanagi afiyo. Lapakaemo, ke'aepa gemo akame hisunage'apae'mo lagufamo lagau'a atalegae, hutapa nehisayana Kalaisi'a lapa o'maegaiye. 3 Nagaemo halate lokiya gemo hu'na lapa pai'nae'mo, ehetapiye, mago vekamo'a, nagufamo lagauka atalo, huno nehisiyana muki ke'aepa ge'amo alagi akame huno hano hisiya kavake'mo hane'niye. 4 Lapakaemo, ke'aepa gemo akame nehuna kavateti'mo Goti aulagale'mo fatago vaya'mo maigune, hutapa nehisayana Kalaisi'mo ataletapa Goti'a fiku lapa maeno nelapamiya kavategamo o'maitapa malaga vaya'mo mai'nae. 5 Inagi Goti'a, naulagale'mo fatago vaya'mo mai'nae, huno laha paisiyafe'mo Goti Auneme'aleti'mo lagesa afita fatago nehutae'mo lavayagunagu huta agava ne'maune. 6 Kalaisi Yesupi'mo mai'netae'mo lagufamo lagau'nisupi olagau'nisupigeno afa'a laha o'maegaiya'monanafa lagesa afita fatago nehuna kavatimo'mo lahau layamopafi'mo lahau'niya kavateti'mo ali'ya'mo ne'alisiyana afa'a laha maegaiye.

7 Hogotetapa Goti kate'mo alagepa hutapa nagu nagu hutapa u'nae. Lapakaemo lama gemo ago akame hu'nayana ina la'mo halate lapatafauno mai'niye. 8 Goti'a lapakaefe'mo keya aeno ge hu'niya vekamo'a ani kavategamo heno lapavayu hulino o'me'niye. 9 Falaova la'nefafi'mo aise'amo kosisiya ya'mo ali'a ne'atageno uneno nehigeno muki'amo aeno apafu leno ko nesiye. 10 Ala kava nepi'mo mai'nona'mofe'mo alu lapakesamo o'afigae, hu'na lole nagesamo o'afi'na magoke nagesamo ne'afuva'monanafa ina la'mo lapakesamo ne'afiya ya'mo alino hosu huno nelapateya vekamo mai'nisifigeno Goti'a anona'alefe'mo amagigiye. 11 Konaga'nimogitapae, hogote'na, lapakufamo lagauta ataleyo, hu'na hapa pai'nova'monanafa hemeni'e'mo ani agufa gege'mo hu'na ae'na hakalo hu'na hapa nepauvesinana apaini hu'a no'nataesine. Mani gemo hapa nepauvesinana Kalaisi'a malipu yosale'mo fali'niya kavafe'mo ava gee'mo hosu apaipamo okali'naesine. 12 Nagaemo lapakesamo ali'a hosu hu'a nelapataya vaya'mogi apakai'api apakufamo hatagau'a atalesayafe'mo nahau'niye. 13 Konaga'nimogitapae, kalavusifi'mo o'maitapa afa'a maisayafe'mo Goti'a lapakaefe'mo ge hu'niye. Afa'a mai'naya'monanafa fiku yanagetapa ani kavateti'mo lapakufamo'mo hau'niya kava'mo hisiya ka'mo valitapa ategae. Valitapa o'atetapa konagatapie'mo lapau lapayamopafi'mo lapau'ninagetapa hapa maeyo. 14 Muki ke'aepa gemo aepa'amo magoke ke'aepa gefi'mo hane'niya gemo'a huno'ae'mo,kagaikae'mo kahau kayamopafi'mo nekahaiya kava huka kahaopale'mo mai'naya vaya'aife'mo kahau kayamopafi'mo kahaino, huno hu'niye. 15 Huno hu'niya'monanafa lapakaemo afela afugana hutapa hapaege kame hutapa apatege nehisayana ehetapiye lapakaitapi'e'mo fiku alita hano hutapa lapatalegayanagi.

16 Ani gee'mo hu'nae'mo, Goti Auneme'amo'mo hau'nisiya kava'mo akame hutapa maigeno'ao atafa lapaipamo'mo ha'ye nehiya kava'mo ko sino afu olegaiyanagi. 17 Atafa laipamo'mo Goti Auneme'ae'mo kame huno ne'ategeno'ae'mo Goti Auneme'amo'mo atafa laipae'mo kame huno ne'ate. Kame huno ne'ateya'mofe'mo lapau'nisiya kava'mo afa'a osugae. 18 Goti Auneme'amo'mo ka'mo alino ho huno nelapatesiya'mo'mo ke'aepa gemo afe'alumelagamo o'mai'nae. 19 Muki vaya'mogimo atafa apaipa apakesamo'mo hau'niya kava'mo ago age'nae. Ani kava'mo hane'niyana ve'alavefati'mo kumai kava'mo huge mafa'nefati'mo kumai kava'mo huge o'ani'ya kava'mo huge apavagage osige'a kalamogi nehaya agufa kava'mo huge nehae. 20 Aigofe goti'apimogife'mo mono nehu'apae'mo apaune kava'mo huge lusa kava'mo huge analisa apamagige apaini hu'a apatege ge vaige apaipa kafa hapaege apaipa lege apakai'apie'mo apakesamo afige alu apaipa alu apaipamo kalige ali'a fako hu'a apatege nehae. 21 Hosu apaipa kalige kamiti apamagige lusi ani'mo nete'a negi nagi gemo huge ogefage hu'a lusi kava hu'a apavamusa valete'a negi nagi huge mago'e hu'a ani agufa hosu kava'mo huge nehae. Hogote'na lapa pai'novanage'na hemenimo halate mago'e gemo, ehetapiye, hu'na lapa nepauve. Afole o'ai'niya afina'mo hogote'na lapa pai'nae'mo mani agufa hosu kava'mo nehaya vaya'mogimo Goti'a yagaino ne'apateya kopi'mo fale'a hai'a mafa'ne'apimogimo afo'apimogi ya'mo ne'aliya kava hu'a Gotitegati'mo hetama'apimo afa'a o'aligae. 22 Mani hosu kava'mo hane'niya'monanafa Goti Auneme'amo'mo apaipafi'mo alagagana huno alagepa kava'mo alino afole aino ne'ate. Ani alagepa kava'mo hane'niyana hapau apayamopafi'mo hapauge apamogaga aige magoke apaipa apakesamo alige hosu kava'mo halate ae'a atagaina hu'a osu'a afa'a maige yuna apaipa kalite'a hapa maege muki afina'mo o'atale'a alagepa kava'mo huge 23 yagu yaga hu'a maige apaipa apakesale'mo alagepa hu'a yagai'a atege hu'a ne'maiya kava'mo hane'niye. Magoke ke'aepa gemo'a mani kava'mo osiyo, huno hu'niya gemo ohane'niye. 24 Kalaisi Yesu vaya'amogimo atafa apaipa apakesagi atafa apaipafati'mo nekaliya kavanagi hapa'ye nehiya kavanagi hu'a ali'a malipu yosale'mo nili aite'a ali'a he ti'a ate'nae. 25 Goti Auneme'amo'mo afa'a maisuna kava'mo alino lami'niya'mofe'mo akame higetao. 26 Vaya'mogi lagitile'mo ali'a asaga hu'a latesayafe'mo lagesamo o'afita konagatimogimo hosu apaipamo kalisiya agufa himu'namu kava'mo huta laipa kafamo ohapaegetao.